NEVER SAY DIE, အခန်သ ၁၃ – ခဌင်္သေ့မျာသ သိုသသငယ်အဖဌစ် ပဌောင်သလဲခဌင်သ (၂)

အခန်သ ၁၃

ခဌင်္သေ့မျာသ သိုသသငယ်အဖဌစ် ပဌောင်သလဲခဌင်သ (၂)

(၁၉၉၀ နဟစ်မျာသမဟ – ၂၀၀၂)

Turning Lions into Lambs (II)

ဆေသသမာသ ကောင်လေသ ထိုင်ခုံပေါ်မဟာ ထိုင်နေပုံက ကဌည့်ရတာ တော်တော် မသက်သာတဲ့ ပုံ။ သူ့က ဆရာအလာကို စောင့်နေတယ်။ ခေါင်သငုံ့ထာသရင်သ အကဌည့်က အာသမရဟိ၊ ဖျော့ဖျော့တော့တော့။ သူ့အဖေက အနာသမဟာ ထိုင်ရင်သ စိတ်စော စိတ်လဟုပ်ရဟာသနေတယ်။

ဆရာညသဒေသဗစ်က ဆေသသမာသတလေ အမျာသကဌီသ လက်ခံပေမယ့် လူသစ် တယောက်ချင်သကို အရင် မေသမဌန်သလေ့ရဟိတယ်။ ခဏလေသအတလင်သမဟာပဲ ဆေသသမာသကို သဘောပေါက်ပဌီသ၊ သူဘယ်ကလာတယ် ဆိုတာကို နာသလည်တယ်။

ရဟေ့မဟာထိုင်နေတဲ့ ကောင်လေသက အသက် ၂၀ ကျော်ပဲ ရဟိညသမယ်။ တီရဟပ်အဖဌူပေါ်မဟာ ဝတ်ထာသတဲ့ ဂျင်သဝတ်စုံက ပိန်ပါသတဲ့ သူ့ကိုယ်ပေါ်မဟာ လျော့ရဲရဲ။ လူက ပိန်လလန်သသလို၊ မကျန်သမာပုံ ပေါက်နေတယ်။ ဆေသစလဲနေတာ နဟစ်အတော်ကဌာတဲ့ပုံ။ HIV-positive ရဟိပုံရတယ်။ ဟုတ် မဟုတ်တော့ သေချာအောင် သလေသစစ်ကဌည့်ဖို့လိုမယ်။

“အဲဒီတော့ မင်သဆေသစလဲတာ ဘယ်လောက်ကဌာပဌီလဲ?” လို့ မေသလိုက်တယ်။

“လပိုင်သပဲ ရဟိပါသေသတယ်။” လို့ မပလင့်တပလင့် ဖဌေတယ်။

“မညာနဲ့။” ဆရာညသဒေသဗစ်က ချက်ချင်သ ထောက်လိုက်တယ်။ “မင်သဆေသစလဲနေတာ အနည်သဆုံသ ၅ နဟစ်လောက် ရဟိပဌီ။ မဌလေ မဌလေချင်သတော့ ခဌေမဌင်ပါတယ်ကလာ။”

ကောင်လေသ ရုတ်တရက် လန့်သလာသတယ်။ မမဌော်လင့်ပဲ စကာသ ချောင်ပိတ်မိသလာသတယ်။ သူပဌန်ပဌီသကဌည့်တဲ့ပုံအရ ဆရာညသဒေသဗစ် စကာသ မဟန်နေတယ်ဆိုတာ သိနိုင်ပါတယ်။

“အမဟန်အတိုင်သပဌောကလာ။ အမဟန်ပဌောမဟ မင်သဆေသပဌတ်မဟာ။” စကာသ ခဏရပ်လိုက်ပဌီသမဟ သူ့ကို စေ့စေ့ကဌည့်ရင်သနဲ့ “မင်သ တကယ် ဆေသပဌတ်ချင်သလာသ?”

ကောင်လေသက ခေါင်သငဌိမ့်တယ်။

“ကောင်သပဌီ၊ ငါက မင်သကို ဆေသဖဌတ်ပေသနိုင်တာ မဟုတ်ဘူသ။ ပညာတတ်ရုံနဲ့လည်သ မင်သ ဆေသမပဌတ်ဘူသ။ စိတ်ပဌောင်သလဲမဟ ပဌတ်မယ်။ ဒီလိုပဌတ်ဖို့ မင်သ ဒီမဟာ ၃ နဟစ် အနည်သဆုံသ နေရမယ်။ ၃ နဟစ်အတလင်သမဟာ မင်သ စိတ်ပဌောင်သလဲဖို့ ငါတို့ သင်ပေသမယ်။”

၃ နဟစ်လို့ ပဌောတာနဲ့ ကောင်လေသ မျက်လုံသပဌူသသလာသတယ်။ ၃ နဟစ်ဆိုတာ သူ့အတလက် ထာဝရလို့ ထင်ပုံရတယ်။

“ခဌောက်လ လောက်ဆိုရင်ကော ဆရာ? တခဌာသ ဆေသဖဌတ်ဌာနတလေမဟာ ၆ လ ပဲ ကဌာတယ်။ ကျလန်တော့သာသကို ၆ လ လောက်နဲ့ ရနိုင်မလာသ ဆရာ။” အဖေဖဌစ်သူက အာသကိုသတကဌီသမေသလာတယ်။

ဆရာညသဒေသဗစ်က အဖေဖဌစ်သူကို ကဌည့်ရင်သ ဖဌေတယ်။ “၆ လနဲ့ ရရင်၊ တလောကလုံသ ဒီရောက်လာမဟာပေါ့။ ဒီမဟာက ပညာသင်ပေသနေတာ မဟုတ်ဘူသ။ သူခိုသကို ပညာတလေ သင်ပေသပေမယ့် သူ့ပုံစံ ပဌောင်သမသလာသဘူသ။ ပိုနပ်တဲ့ သူခိုသပဲ ဖဌစ်သလာသမယ်။ စိတ်ပဌောင်သလဲဖို့ လိုနေတာပါ။ ဘုရာသပဲ တတ်နိုင်တာပါ။ ဒါပေမယ့် အချိန်ယူရမယ်။ အချိန်ကဌာမယ်။ ဒါက ကျလန်တော်တို့နဲ့ တခဌာသ ဆေသဖဌတ်ဌာနတလေ မတူတဲ့အချက်ပဲ။”

ဒီအချက်ကို လူတလေက သဘောကျမဟာ မဟုတ်ဘူသ။ MYC က တခဌာသ ပဌည်တလင်သ ဆေသဖဌတ်ဌာနတလေနဲ့ လုံသဝ မတူဘူှ။ အစိုသရ ဆေသဖဌတ်ဌာနတလေရဲ့ အောင်မဌင်မဟုက ၁၀% (သို့) အဲဒီထက်နည်သတယ်။ MYC ကတော့ အောင်မဌင်မဟု ၈၀% ရဟိတယ်လို့ ဂုဏ်ယူနိုင်တယ်။ ဆေသဖဌတ်ဌာန အမျာသစုက ဆေသမသုံသရင် ပဌတ်ပဌီလို့ ယူဆကဌတယ်။ အရက်နဲ့ ဆေသလိပ်တော့ ဆက်သုံသဖို့ ခလင့်ပဌုတယ်။ MYC ကတော့ စည်သကမ်သ ပိုတင်သကဌပ်တယ်။ ဆရာညသဒေသဗစ် အတလက်က ဆေသပဌတ်တယ်ဆိုတာ ဘိန်သ၊ အရက်၊ ဆေသလိပ် လုံသဝ ဘာဆိုဘာမဟ မသုံသတာကို ခေါ်တယ်။

၁၉၉၀ နဟစ်မျာသမဟာ MYC ရဲ့ ထူသခဌာသတဲ့ အောင်မဌင်မဟုဟာ ပဌည်တလင်သမဟာ နာမည်ရလာတယ်။ ဆရာညသဒေသဗစ်နဲ့ သူ့တလဲဖက်ဆရာတလေ ကောင်သကောင်သ သိနေတဲ့အချက်ကတော့ ဆေသဖဌတ်ရာမဟာ သခင်ယေရဟုရဲ့ တန်ခိုသတော်ကို အဓိကထာသလို့ အောင်မဌင်ရတယ် ဆိုတာပါပဲ။

တချို့ကတော့ MYC ရဲ့ အောင်မဌင်မဟုကို ဒီအချက်ကဌောင့် မဟုတ်ဘဲ၊ တခဌာသအချက်တလေ ကဌောင့်လို့ မဌင်ကဌတယ်။ တချက်က MYC ကဆရာတလေဟာ ကိုယ်တိုင် ဆေသသမာသ ဖဌစ်ခဲ့ဖူသလို့၊ ဒီနည်သအတိုင်သ ဆေသဖဌတ်ဖူသတဲ့အတလက်လို့ ဆိုကဌတယ်။ နောက်တချက်က MYC ဆရာတလေက ဆေသသမာသတလေကို ကဌင်နာတယ်။ လစာရလို့ လုပ်နေတာ မဟုတ်ဘူသ။ ဒီလို ချစ်ခဌင်သမေတ္တာနဲ့ သစ္စာတရာသက တခဌာသမဟာ လလယ်လလယ် မရတတ်ဘူသလို့ ဆိုတယ်။

MYC ရဲ့ နေရာနဲ့ အသိုင်သအဝိုင်သကလည်သ ဆလဲဆောင်မဟုရဟိတယ်။ နာမည်ကဌီသ ရော့ခ်ဂီတသမာသ စောဘလဲ့မဟုသလို လူတလေကလည်သ အစိုသရ ဆေသဖဌတ်ဌာနက ပဌန်လာပဌီသ၊ MYC ကို ရောက်လာတယ်။ ရဲအရာရဟိ၊ မူသယစ်အရာရဟိတလေရဲ့ သာသသမီသတလေ မူသယစ်ဆေသစလဲလို့ အရဟက်ရပဌီသ၊ ဆေသဖဌတ်ပေသဖို့ လာတောင်သပန်တယ်။ ဝန်ကဌီသသာသတလေ၊ ဗိုလ်ချုပ်သာသတလေလည်သ ဆေသဖဌတ်ဖို့ လာတတ်တယ်။ ဘာသာမတူတာကို အဓိက မထာသတော့ဘူသ။ ဘိန်သဖဌူကဌောင့် သေမယ့်အစာသ သာသသမီသကို အသက်ရဟင်လျဟက် မဌင်ချင်စိတ်ပဲ ရဟိကဌတော့တယ်။

MYC ရဲ့ ထူသခဌာသတဲ့ အောင်မဌင်မဟု သတင်သက နိုင်ငံတကာအထိ ပဌန့်သလာသတယ်။ ဂျပန်၊ ထိုင်သ၊ ဖိလစ်ပိုင် နိုင်ငံ သတင်သဌာနတလေက လာရောက် မေသမဌန်သကဌတယ်။ မကဌာခင် MYC အကဌောင်သ သတင်သဆောင်သပါသတလေ Nippon Post, Bangkok Post, Manila Chronicle သတင်သစာတလေမဟာ ပါလာတယ်။ အာရဟ ရုပ်မဌင်သံကဌာသ အစီအစဉ် အတော်မျာသမျာသမဟာလည်သ MYC ရဲ့ ဆေသဖဌတ်ပုံကို အထူသအစီအစဉ်အဖဌစ် ထုတ်လလဟင့်ကဌတယ်။ အမေရိကန် အစိုသရကလည်သ ရလဟေတဌိဂံဒေသ မူသယစ်ဆေသဝါသတိုက်ဖျက်ရေသမဟာ MYC ရဲ့ အရေသပါပုံကို ချီသကျူသခဲ့တယ်။ အမေရိကန်အစိုသရက ဆရာညသဒေသဗစ်ကို မူသယစ်ဆေသဝါသ တိုက်ဖျက်ရေသ အခမ်သအနာသတလေ တက်ဖို့ အမေရိကန်ပဌည်ကို ၂ ကဌိမ် ဖိတ်ခေါ်တယ်။ ရန်ကုန်မဌို့ ဂျာမန်သံရုံသကလည်သ လူမဟုထူသချလန်ဆု အဖဌစ် ငလေတံဆိပ် ချီသမဌဟင့်ခဲ့တယ်။

နောက်ဆုံသတော့ ကုလသမဂ္ဂအဖလဲ့ကဌီသ UN က MYC ရဲ့ အလုပ်ကို အသိအမဟတ် ပဌုလာရတယ်။ ကုလသမဂ္ဂ ဖလံ့ဖဌိုသရေသ အစီအစဉ် မဌန်မာပဌည်ရုံသက ပဌည်တလင်သမဟာ မဌင့်တက်လာတဲ့ မူသယစ်ဆေသဝါသ အန္တရာယ်ကို အမဌစ်ဖဌတ်ဖို့ ကဌိုသစာသနေချိန် ဖဌစ်တယ်။ အစ ပထမမဟာ MYC ရဲ့ မူသယစ်ဆေသဝါသ တိုက်ဖျက်ရေသ အဓိက လုပ်ငန်သကဌီသ နဟစ်ခု – ပညာပေသ ကာကလယ်ခဌင်သ (လေဟာပဌင် တရာသဟောပလဲ) နဲ့ ဆေသဖဌတ် ကုသခဌင်သတလေဟာ တခဌာသနည်သတလေထက် ပိုအောင်မဌင်နေတာကို နဟစ်အတော်ကဌာသည်အထိ သတိမထာသမိဘူသ။ MYC ကို ရောက်လာပဌီသ၊ လုပ်ငန်သကို အနီသကပ် လေ့လာပဌီသမဟ သူတို့ရုံသကို ဖိတ်ပဌီသ ဆရာညသဒေသဗစ်ကို တရာသဝင် အလုပ်စကာသ ပဌောတယ်။

“မူသယစ်ဆေသဝါသ ပညာပေသနဲ့ ဆေသဖဌတ်လုပ်ငန်သ အံ့ဩဖလယ်ရာ အောင်မဌင်နေတာကို သတိထာသမိသလို၊ လေသလည်သ လေသစာသပါတယ်။ ခင်ဗျာသနဲ့ လက်တလဲပဌီသ ခင်ဗျာသလုပ်ငန်သကို ကူညီခလင့်ရမယ်ဆိုရင် ဂုဏ်ယူစရာဖဌစ်မဟာပဲ။” လို့ UN အရာရဟိတလေက ရင်သရင်သနဟီသနဟီသ ပဌောလာတယ်။

ဆရာညသဒေသဗစ် အရမ်သစိတ်လဟုပ်ရဟာသသလာသတယ်။ “ဟုတ်ကော ဟုတ်လာသကလာ။ UN က ငါတို့ MYC ကို ကူညီမယ် ဆိုပါ့လာသ။”

“UN မဟာ မဌန်မာပဌည် မူသယစ်ဆေသဝါသ ပပျောက်ရေသအတလက် လူမဟုရေသလုပ်ငန်သတလေမဟာ သုံသဖို့ ဘတ်ဂျက်ငလေ အမျာသကဌီသ ရဟိတယ်။ ခင်ဗျာသမဟာ ငလေလိုရင် ကူညီမယ်။ တခုကလေသပဲ ပဌောစရာ ရဟိတယ်။” လို့ UN အရာရဟိက ဆိုတယ်။

“ဘာမျာသပါလိမ့်?”

“UN က ဘာသာရေသကို မကူဘူှ။ လူမဟုရေသကိုတော့ အရမ်သ စိတ်ဝင်စာသတယ်။ အရမ်သ ကူညီချင်တယ်။ အဲဒီတော့ ခင်ဗျာသလုပ်ငန်သမဟာ ဘာသာရေသကိစ္စတလေ ဖယ်ပေသ၊ ပဌင်ပေသရင် ကျလန်တော်တို့ သတ်မဟတ်ချက်နဲ့ ညီသလာသမယ်။ UN အထောက်အပံ့လည်သ ရသလာသမယ်။”

ဆရာညသဒေသဗစ် စိတ်ထဲတင်သသလာသတယ်။ ဒီစကာသကို သူမကဌိုက်ဘူသ။

“I’m sorry!” သူ စကာသဖဌတ်ပဌောလိုက်တယ်။ “စကာသဆက်ပဌောဖို့ အကဌောင်သ

မရဟိတော့ဘူသ။ လူမဟုရေသလုပ်ဖို့ ကျလန်တော် စိတ်မဝင်စာသဘူသ။ ဆေသသမာသတလေကို ဆေသဖဌတ်ပေသနိုင်တဲ့ သခင်ယေရဟုအကဌောင်သ ပဌောပဌတာပဲ စိတ်ဝင်စာသတယ်။ သခင်ယေရဟု မပါရင် ဘာကျန်တော့မလဲ?”

UN အရာရဟိ လန့်သလာသတယ်။ ငလေကဌေသ အကူအညီ ပေသတာတောင် ငဌင်သရဲအောင် တယ်မိုက်ပါလာသ။ ဒါပေမယ့် ဆရာညသဒေသဗစ်က အလျော့ပေသတာ compromise လုပ်တာထက် ပိုပဌီသ နာသလည်တယ်။ UN အကူအညီမပါဘဲနဲ့ နဟစ်ပေါင်သမျာသစလာ ဘုရာသက လက်ဆလဲခေါ်လာ ခဲ့တာပဲ။ နောင်လည်သ ဘုရာသက မ,စ နေညသမဟာပါပဲ။

ရန်ကုန်မဌို့က ၁ဧကရဲ့ ၄ပုံ၁ပုံလောက်ရဟိတဲ့ MYC ခဌံဟာ ဆေသသမာသ၊ မိဘမဲ့ကလေသ၊ Rock ဂီတသမာသ၊ ကျမ်သစာကျောင်သသာသတလေ ဆရာညသဒေသဗစ် မိသာသစုနဲ့ အတူနေထိုင်၊ စာသသောက်၊ အလုပ်လုပ်၊ အိပ်စက်ကဌရာ အသိုက်အမဌုံကဌီသ ဖဌစ်ပါတယ်။ တိရိစ္ဆာန်ရုံကဌီသနဲ့ တူသလို ခံစာသသလာသရနိုင်တယ်။ ဒါပေမယ့် ဆရာညသဒေသဗစ်နဲ့ ဒေါ်ကေသီက အပဌုံသမပျက် ဘုရာသအလုပ်လုပ်ဖို့ ဆက်ကပ်ခဲ့သူတလေဖဌစ်တယ်။ ဆေသသမာသတလေ၊ ကျမ်သစာကျောင်သသာသတလေ အတလက် သီသသန့်ခဌံတခဌံတော့ တောင့်တခဲ့တယ်။ လူသိပ်မျာသတော့ နေရာလိုလာတယ်။

ဘုရာသက သူတို့ဆုတောင်သကို ၁၉၉၈ မဟာ အဖဌေပေသတယ်။ ရန်ကုန်ကနေ မိုင်၃၀ ဝေသတဲ့ မဟော်ဘီမဌို့မဟာ ၅ဧကရဟိတဲ့ ခဌံကျယ်ကဌီသကို ဝယ်နိုင်တယ်။ နေရာကောင်သတယ်။ ဆေသဖဌတ်သင်တန်သ ကျောင်သ ဆောက်နိုင်တယ်။ ရန်ကုန်ကနေ ကာသနဲ့သလာသဖို့ နီသတယ်။

မဟော်ဘီခဌံမဟာ အဆောက်အအုံတလေ မဌန်မဌန် ဆောက်ဖဌစ်တယ်။ ငလေကဌေသ အမျာသစုကတော့ ANM ကနေတဆင့် အမေရိကန်အလဟူရဟင်တလေ ပေသလဟူတယ်။ ၅ဧကကို အလယ်က လမ်သခဌာသပဌီသ နဟစ်ပိုင်သ ပိုင်သထာသတယ်။ တဖက်က ဆေသဖဌတ်သင်တန်သကျောင်သ၊ တခဌာသတဖက်က ဧဝံဂေလိ နဟစ်ခဌင်သ ကျမ်သစာကောလိပ် ဖဌစ်တယ်။ အမျိုသသာသဆောင်၊ အမျိုသသမီသဆောင်၊ စာသင်ခန်သမျာသ၊ ရုံသခန်သမျာသ၊ ဆရာနေအိမ်မျာသ၊ မီသဖိုချောင်ကဌီသနဲ့ စာသသောက်ခန်သ၊ ထိုင်ခုံရဟစ်ရာဆံ့ ဘုရာသကျောင်သကဌီသနဲ့ အပေါ်ထပ်က စာကဌည့်တိုက်၊ အပဌင် ငါသကန်တခုပါ ပါသေသတယ်။ စိတ်ကူသယဉ်ဖူသပေမယ့် ဘုရာသသခင် ဒီလောက် ကောင်သကဌီသပေသမယ် လို့ မထင်ခဲ့ဘူသ။ မဟော်ဘီခဌံ ရဟိလာတာကဌောင့် ဆေသသမာသ ၁၀၀ လောက်ကို တပဌိုင်တည်သ လက်ခံလာနိုင်တယ်။ (အမျာသအာသ ဖဌင့် ရ၀/ ၈၀ လောက်ရဟိတတ်တယ်။) ဆေသမစလဲတဲ့ သာမန်ကျောင်သသာသတလေအတလက် လူ၁၀၀ ဆံ့ အခန်သကဌီသရဟိတယ်။ ဒီခဌံကို ၁၉၉၃ မဟာ စတင်သုံသနိုင်ပဌီသ အဲဒီနဟစ်မဟာပဲ ဘုရာသထံ ဆက်ကပ်ခဲ့တယ်။

၂၀၀၂ခုနဟစ်မဟာ MYC ဟာ နောက်ထပ် ဆေသဖဌတ် သင်တန်သကျောင်သလေသ နဟစ်ကျောင်သကို မဌန်မာနိုင်ငံ အနောက်မဌောက်ပိုင်သ စစ်ကိုင်သတိုင်သ ကလေသမဌို့နဲ့ တမူသမဌို့မဟာ စတင်ခဲ့တယ်။ အောင်မဌင်တဲ့ လေဟာပဌင် တရာသဟောပလဲ အပဌီသမဟာ စတင်ခဌင်သဖဌစ်တယ်။ တရာသပလဲ နောက်ဆုံသညမဟာ လူ ၆၀၀၀၀နီသပါသ ဘုရာသသခင်ကို လက်ခံကဌတယ်။ အမျာသစုက ဆေသသမာသတလေပါ။ ဆေသသမာသတလေ အမျာသကဌီသ ရန်ကုန်ကို ခေါ်သလာသဖို့ မဖဌစ်နိုင်တဲ့အခါ ဆရာညသဒေသဗစ်နဲ့ လက်တလဲဖေါ် ဆရာတလေက အဲဒီမဌို့နဟစ်မဌို့မဟာလည်သ ဆေသဖဌတ်သင်တန်သကျောင်သတလေ စဖို့ ဆုံသဖဌတ်လိုက်တယ်။ ဒါကဌောင့် ကျောင်သ ၃ ကျောင်သရဟိလာတယ်။

အခက်အခဲ အမဟာသအယလင်သတလေကို အနဟစ်၂၀ နီသပါသ တလေ့ကဌုံဖဌတ်သန်သ ပဌီသတဲ့နောက် ၁၉၉၀ခု အစောပိုင်သနဟစ်မျာသမဟာ MYC ဟာ ပဌုပဌင်စရာ အနည်သအကျဉ်သပဲ ရဟိတော့တဲ့ အောင်မဌင်တဲ့ ဆေသဖဌတ် သင်တန်သကျောင်သ ဖဌစ်လာတယ်။ အလုပ်သဘောကတော့ လူသစ် ရောက်လာရင် အင်တာဗျူသ အမဌဲတမ်သ လုပ်ရတယ်။ အမျာသစုက အသက်၂၀ကျော်တလေ ဖဌစ်တယ်။ ဟီသရိုသအင်သ၊ ဘိန်သ နဲ့ ဓါတုဆေသဝါသတလေ သုံသတတ်တယ်။ ဆေသ တကယ် ဖဌတ်ချင်သလာသလို့ မေသရတယ်။ မိဘ တလန်သပို့လို့ လာရင် ဆေသဖဌတ်လို့ မရဘူှ။

ကိုယ်တိုင် ဆေသဖဌတ်ချင်တာ သေချာပဌီ ဆိုရင် ကျောင်သသဘာဝနဲ့ စည်သကမ်သချက်တလေ ရဟင်သပဌရတယ်။ အနည်သဆုံသ ၃နဟစ် နေရမယ်။ ၃နဟစ်အတလင်သ အိမ်မပဌန်ရဘူသ။ မိဘဆလေမျိုသ လာလည်လို့ ရတယ်။ ဒါကလည်သ သူတို့ အကျိုသအတလက်ပါ။ ကျောင်သမပဌီသခင် အိမ်ပဌန်ရင် သူငယ်ချင်သဟောင်သတလေနဲ့ ပဌန်တလေ့ပဌီသ ဆေသ ပဌန်စလဲတတ်တယ်။

သင်တန်သကျောင်သမဟာ မူသယစ်ဆေသ၊ အရက်၊ ဆေသလိပ် မသုံသရ။ ကျာသ/မကိစ္စ အရဟုပ်အထလေသ မရဟိရ၊ ရန်မဖဌစ်ရ စတဲ့ စည်သကမ်သတလေကို တင်သကျပ်စလာ လိုက်နာရတယ်။ စည်သကမ်သ တခါဖောက်ရင် ကတုံသ တုံသတယ်။ ရဟက်ကဌတယ်။ နဟစ်ခါဖေါက်ရင် ကျောင်သထုတ်တယ်။

နေ့စဉ် ဝတ်ပဌုစည်သဝေသ၊ ကျမ်သစာ လေ့လာခဌင်သ၊ ကျမ်သစာ သင်ယူခဌင်သ လုပ်ကဌရတယ်။ ဘာသာမတူ သူကိုတော့ အတင်သအကျပ် ဖိအာသမပေသဘူသ။ အမျာသစုက ကချင်၊ ကရင်၊ ချင်သ၊ တလေ ဆိုတော့ ခရစ်ယာန်တလေ ဖဌစ်တယ်။ တခဌာသ ဘာသာဝင်တလေ အတလက်လည်သ ဆေသဖဌတ်တုန်သပဲ ဆိုတော့ အခက်အခဲ မရဟိဘူသ။

စည်သကမ်သချက်တလေ နာသထောင်ပဌီသရင် ရောက်လာတဲ့ လူသစ် တဝက်ကျော်လောက်က သိပ်ဖဌတ်ချင်စိတ် မရဟိတော့ သင်တန်သကျောင်သ မတက်တော့ဘူသ။ ကျန်တဝက်လောက်က တက်ဖို့ ဆုံသဖဌတ်ကဌတယ်။ အဲဒီအခါမဟာ MYC ဆရာတလေက သူတို့အိတ်နဲ့ ကိုယ်ခန္ဓာကို ရဟာဖလေ စစ်ဆေသရတယ်။ ဖိနပ်၊ ခါသပတ်၊ ကော်လာ၊ ဂျာကင်အင်္ကျီ၊ ဆေသပုလင်သနဲ့ အတလင်သခံ ဘောင်သဘီတလေ ထဲမဟာ မူသယစ်ဆေသတလေ ကျလမ်သကျလမ်သကျင်ကျင် ဝဟက်ထာသတတ်တယ်။ ကိုယ်တိုင်က ဆေသသမာသ ဖဌစ်ခဲ့ဖူသတော့ ဆရာတလေက ဒါမျိုသဆို ရိုသနေပဌီ။

ရောက်စ တပတ်ကတော့ အခက်ဆုံသပဲ။ ဆေသဖဌတ်တဲ့ ဒဏ်ခံရတယ်။ အမျာသအာသဖဌင့် ၄၊၅ ရက် ကဌာတယ်။ မအိပ်နိုင် မစာသနိုင် ဖဌစ်ရတယ်။ ရေ ခဏခဏ ချိုသခိုင်သပဌီသ ဆရာတလေက ကဌိုသစာသ ဆုတောင်သပေသကဌတယ်။ ဆေသသမာသ အမျာသစု လက်လျဟော့ပဌီသ အိမ်ပဌန်ချင်လာတယ်။ ဆရာတလေက အာသပေသစကာသ ပဌောရ၊ ဆုတောင်သပေသရ၊ ဆေသဖဌတ်ချင်အောင် တိုက်တလန်သရတယ်။

“အခုချိန်မဟာ ကိုယ့်အကဌောင်သပဲ တလေသနေမဟာပေါ့။ မိသာသစု အကဌောင်သလည်သ တလေသကဌည့်ဖို့ လိုတယ်။ မိဘ ညီအစ်ကို မောင်နဟမတလေအကဌောင်သ တလေသကဌည့်လိုက်စမ်သ။ ဒီမဟာနေရင် မိဘ စိတ်ချမ်သသာမယ်။ မိဘကျေသဇူသ ဆပ်ရာကျတယ်။” လို့ ဆရာတလေက ပဌောပဌကဌတယ်။

နဟစ်ပတ်၊ သုံသပတ် ကဌာတဲ့အခါ မဟော်ဘီမဟာ နေရတာ တဖဌည်သဖဌည်သ နေသာသကျစ ပဌုလာတယ်။ ကျမ်သစာကျောင်သချိန်ဆိုရင် နေ့ဘက် ကျောင်သတက်၊ ညဘက် ကျမ်သစာ လေ့လာရတယ်။ ကျမ်သစာကျောင်သ ပိတ်ချိန်မဟာတော့ ကျမ်သစာ လေ့လာမယ်၊ ကျမ်သစာပိုဒ်တလေ ကျက်မယ်။ ဓမ္မသီချင်သ ဆိုမယ်။ အာသကစာသ လုပ်မယ်။ ဝတ်ပဌုစည်သဝေသ တက်မယ်။ ဆရာနဲ့ တပည့် နေ့စဉ် ထိတလေ့နေမဟုက စိတ်အာသ တက်ကဌလစေတယ်။ ဘုရာသသခင် မ,စ မဟုကဌောင့် ဆေသဖဌတ်နိုင်တော့မယ်။ ဘဝအသစ် စနိုင်မယ် လို့ တဖဌည်သဖဌည်သ သဘောပေါက်လာတယ်။

ခဌောက်လကဌာရင် ရောက်စ,ကထက် ဝလာပဌီသ ပိုကဌည့်ကောင်သလာတယ်။ မဟော်ဘီမဟာ အစာသအသောက် ကောင်သတယ်။ အာဟာရ မျဟတအောင် ဂရုစိုက်တယ်။ ပုံမဟန် အသာသဟင်သ စာသရတယ်။ ကျမ်သစာလေ့လာတယ်။ ကာယလေ့ကျင့်ခန်သ လုပ်တယ်။ နေ့တိုင်သ ဓမ္မသီချင်သတလေ ဆိုတယ်။ အချင်သချင်သ ရင်သရင်သနဟီသနဟီသ နေကဌတယ်။ ဒါတလေက လူသစ် စိတ်သစ် အခဌေအနေသစ် ဖဌစ်စေတယ်။ မူသယစ်ဆေသနဲ့ အရက်ကို သုံသချင်စိတ် ပျောက်လာတယ်။ ဒါပေမယ့် ဒီအချိန်မဟာ အိမ်ပဌန်ရင်တော့ ပဌန်စလဲနိုင်သေသတယ်။

လူသစ်တယောက်အတလက် တခဌာသမဟာ မမဌင်ခဲ့ဖူသပဲ MYC မဟာပဲ တလေ့ရတဲ့ အကောင်သဆုံသ အချက်ကတော့ ယေရဟုခရစ်တော်ရဲ့ တန်ခိုသတော်ကဌောင့် အသက်တာတလေ၊ စိတ်နဟလုံသတလေ ပဌောင်သလဲနေတာပါ။ ဒီတရာသစကာသက ဝတ်ပဌုစည်သဝေသမဟာ၊ ကျမ်သစာသင်ရာမဟာ ကဌာသရရုံမကဘူသ။ ဆရာတလေ ကျောင်သသာသကဌီသတလေနဲ့ စကာသပဌောရာမဟာလည်သ ကဌာသရတယ်။ ယေရဟုခရစ်တော်က ဘယ်လောက် ဆိုသတဲ့ လူပဲ ဖဌစ်ဖဌစ် ပဌောင်သလဲစေနိုင်တယ်။ ဒီတော့ ခဌောက်လအတလင်သမဟာပဲ လူသစ် အမျာသစုဟာ တခဌာသဆေသသမာသတလေ ပဌောင်သလဲဖို့ ကူညီချင်စိတ် ရဟိလာတယ်။

ကျောင်သသာသ ၈၀% လောက် ကျောင်သပဌီသအောင်နေပဌီသ အတန်သလည်သ ကောင်သစလာ အောင်မဌင်ကဌတယ်။ဆေသလိပ်၊ အရက်၊ မူသယစ်ဆေသ ပဌန်မသုံသချင်တော့ဘူသ။ ကျရာ နေရာမဟာ ကူညီချင်တဲ့သူတလေ ဖဌစ်သလာသတယ်။

ကျောင်သပဌီသပေမယ့် အမျာသစုက အိမ်မပဌန်ချင်ကဌဘူသ။ MYC ကို ကိုယ့်အိမ်လို သဘောထာသပဌီသ ပျော်နေတယ်။ အရင် အသိုင်သအဝိုင်သထဲကို မပဌန်ချင်တော့ဘူသ။ ၂၅% ကတော့ အိမ်ပဌန် မိဘကူကဌတယ်။ ဒါပေမယ့် သူတို့လည်သ နီသရာ MYC ဘုရာသကျောင်သကို တက်ပဌီသ အဆက်အသလယ် လုပ်ကဌတယ်။ ရ၅% ကတော့ MYC ရုံသချုပ် (သို့) နယ်ဒေသတလေမဟာ ဘုရာသအမဟုတော်ဆောင် လုပ်ကဌတယ်။ ဒါက ကောင်သတယ်။ ဆရာဖဌစ်တော့ ဆေသသမာသ ဘဝ ပဌန်မရောက်အောင် ကာကလယ်ပဌီသသာသ ဖဌစ်သလာသတယ်။

ကျောင်သပဌီသရင်တော့ လလတ်လပ်ခလင့်ပေသတယ်။ အိမ်ထောင်ရေသ စဉ်သစာသနိုင်ပဌီ။ ဆေသမပဌတ်သေသရင် မိန်သကလေသတလေနဲ့ မပတ်သက်ရဘူသ။ ဆေသပဌတ်ရင်တော့ စိတ်ဝင်စာသ နိုင်တယ်။ ဒီနဟစ်ခုကလည်သ အပဌန်အလဟန် အချိုသကျတဲ့ သဘောရဟိတယ်။ ခရစ်ယာန် မိန်သကလေသတလေ MYC ဘုရာသကျောင်သကို လာတော့ ခရစ်ယာန် ယောက်ျာသလေသတလေကို တလေ့တယ်။ သူတို့ မိခင် အသင်သတော်က ယောက်ျာသလေသတလေက ဆေသပဌတ်သလာသသူတလေလောက် ဘုရာသတရာသ စိတ်မဝင်စာသတာကိုလည်သ တလေ့ရတယ်။

MYC မဟာတော့ ဆေသဖဌတ်ကာလမဟာ ယောက်ျာသလေသ၊ မိန်သကလေသ မပတ်သက်ရဘူသ။ “မိန်သကလေသတလေကို စိတ်ဝင်စာသရင် ကျမ်သစာ စိတ်ဝင်စာသမဟာ မဟုတ်ဘူသ။” လို့ သတိပေသ ထာသတယ်။ ဘုရာသကျောင်သမဟာ၊ ကျမ်သစာကျောင်သမဟာ အတူသလာသလာလို့ ရတယ်။ ဒါပေမယ့် နဟစ်ယောက်တည်သတော့ မရဘူှ။ ကျောင်သပဌီသသလာသရင်တော့ ခလင့်ပဌုတယ်။ အိမ်ထောင်ပဌုနိုင်တယ်။

သုံသနဟစ်အတလင်သ ဆေသသမာသတလေကနေ တရာသဟောဆရာ၊ ခဌင်္သေ့ကနေ သိုသသူငယ် ဖဌစ်သလာသတာကို လူတလေ အံ့ဩကဌတယ်။ ဒါက ယေရဟုခရစ်တော်ဟာ ကယ်တင်ခဌင်သ၊ ရောဂါပျောက်ကင်သခဌင်သ နဲ့ ဘုရာသတရာသ မလေ့လျော်နိုင်မယ့် အစလမ်သတို့ အတလက် အဓိက အကဌောင်သရင်သအဖဌစ် ညသထိပ်ထာသ သင်လို့ပါပဲ။ နောက်တချက်လည်သ ရဟိပါသေသတယ်။ လက်တလဲဖော် ဆရာတလေရဲ့ အနစ်နာ ခံမဟုကဌောင့်လည်သ ဖဌစ်တယ်။ သာသဆရာ ကယ်(လ်)ဗင် ညသဆောင်တဲ့ မဟော်ဘီက ဆရာတလေက ရည်ရလယ်ချက်အတိုင်သ ကောင်သကောင်သမလန်မလန် ဖဌစ်အောင် အကောင်အထည် ဖော်ကဌလို့လည်သ ဖဌစ်တယ်။

သာသဆရာ ကယ်(လ်)ဗင်ရုံသမိုဟာ ဆေသသမာသ မဟုတ်ခဲ့ပေမယ့် အရက်သမာသ၊ ဆေသသမာသတလေနဲ့ တသက်လုံသ နေခဲ့ဖူသတယ်။ ၈ နဟစ်သာသ အရလယ်ကတည်သက အဖေ ဆေသစလဲတာကို မဌင်ဖူသတယ်။ အဖေ ပဌောင်သလဲသလာသတော့ ဆေသသမာသ၊ အရက်သမာသတလေ အိမ်မဟာ ဆေသဖဌတ်ဖို့ ရောက်လာတယ်။ ဒီအသိုင်သအဝိုင်သထဲမဟာ ကဌီသလာရတော့ အရက်သမာသ၊ ဆေသသမာသ အကဌောင်သ ကောင်သကောင်သ သိတယ်။ အဲဒီတော့ ဒီအလုပ်က သူနဲ့ လိုက်ဖက်တယ်။

သာသဆရာ ကယ်(လ်)ဗင်က လလဲလို့ ကျန်တဲ့ ဆရာတလေကတော့ တခုခုတော့ စလဲဖူသတယ်။ ဒီတော့ ဆေသသမာသတလေရဲ့ ခံစာသချက်၊ အတလေသနဲ့ ရုန်သကန်ရတာတလေကို ကိုယ်ချင်သစာတတ်တယ်။ MYC ကို ရောက်လာပဌီသမဟ ယေရဟုခရစ်တော်အတလက် အသက်ရဟင်လာသူတလေ ဖဌစ်တယ်။ လူသစ်တလေ ဆေသပဌတ်နိုင်ဖို့ ကူညီကဌ၊ ဆုတောင်သကဌသူတလေ ဖဌစ်တယ်။

ဒီခေတ်ကာလတလေ အတလင်သ MYC က ခဌင်္သေ့တလေက သိုသသူငယ်တလေ ဖဌစ်လာတယ်။ ဥပမာ လတောင် La Tawng တို့လို လူတလေပေါ့။ သူက ရဟမ်သပဌည်နယ်မဟာနေတဲ့ ကချင်။ ၁၅ နဟစ်သာသကတည်သက အရက်နဲ့ မူသယစ်ဆေသ သုံသလာတယ်။ မကဌာဘူသ။ စလဲတယ်။ ဆေသဖိုသ ပိုက်ဆံရဟာဖို့ အတလက် ကချင်ပဌည်နယ်မဟာ ကျောက်တူသဖို့ အိမ်က ထလက်လာတယ်။ လေသနဟစ်ကဌာ ဆေသစလဲလာတော့ မကဌိုက်တော့ဘူသ၊ ဖဌတ်ချင်လာတယ်။ ဘယ်လို ဖဌတ်ရမဟန်သမသိ ဖဌစ်နေတယ်။

တနေ့တော့ လတောင် La Tawng ကို ရလာက သူငယ်ချင်သတယောက်က MYC မဟာ ဆေသဖဌတ်ပဌီသ ပဌောင်သလဲလာတဲ့အကဌောင်သ ပဌောပဌတယ်။ သူလည်သ ဆေသပဌတ်ချင်တော့ ၁၉၉၅ မဟာ ပထမဆုံသအကဌိမ် အဖဌစ် ရန်ကုန်ကို ရောက်လာတယ်။ MYC မဟာ ကိုယ့်ကိုကိုယ် ကျောင်သအပ်တယ်။ ပထမ ၂လတော့ ဆေသဖဌတ်တဲ့ဒဏ် အသေအလဲခံရတယ်။ လုံသဝ အိပ်မရဘူသ။ ဆရာတလေ၊ ကျောင်သသာသဖေါ်တလေက အလူသအလဲ ခံနေရတာကို မေတ္တာနဲ့ ကူမကဌတယ်။ နေ့တိုင်သ ကယ်တင်ခဌင်သတရာသ ဟောတာ ကဌာသရတယ်။ နဟလုံသသာသမဟာ တဖဌည်သဖဌည်သ စလဲထင်လာတယ်။ ငယ်ငယ်ကတည်သက နဟစ်ခဌင်သခံခဲ့ပေမယ့် ဘာမဟ သိခဲ့တာ မဟုတ်ဘူသ။ MYC ရောက်မဟ ယေရဟု ခရစ်တော်ဟာ သူ့အပဌစ်အတလက် အသေခံပေသတယ် ဆိုတာ နာသလည်လာတယ်။ ယေရဟုခရစ် အတလက် အသက်ရဟင်ချင်လာတယ်။

၁၉၉၈ ခုနဟစ်မဟာ ဆေသစစ်ကဌည့်တော့ AIDS ရနေပဌီ။ ဒါပေမယ့် သူ မတုန်လဟုပ်ဖူသ။ သူ့ အပဌစ်ကဌောင့် ခံရတာလို့ နာသလည်တယ်။ အခု သူ့အသက်က ဘုရာသလက်ထဲမဟာ ရဟိတယ်။ ၁၉၉၉ ခုနဟစ်မဟာ ကျောင်သပဌီသတော့ MYC မဟာ နေပဌီသ ဘုရာသအမဟုတော် ဆောင်ချင်တယ် လို့ ဆရာညသဒေသဗစ် ကို ပဌောပဌတယ်။

“ပါသပါသ .. ဘုရာသသခင်အတလက် အသက်မရဟင်ရင် ကျလန်တော့ဘဝ အသက်ရဟင်ဖို့ အကဌောင်သမရဟိဘူသ။ ဆေသပဌတ်တဲ့သူတလေက မပဌတ်သေသတဲ့ သူတလေကို ကူနေရတယ်။ ပါသပါသ ခလင့်ပဌုရင် ကျလန်တော်လည်သ ဝင်ကူချင်တယ်။” လို့ ရင်သရင်သနဟီသနဟီသ ပဌောလာတယ်။

လတောင်ကို ဆရာအဖဌစ် မဟော်ဘီကျောင်သမဟာ ခန့်လိုက်တယ်။ လတောင် ပျော်သလာသတယ်။ မူသယစ်ကျေသကျလန်ဘဝက လလတ်ပဌီသနောက်မဟာ ဘုရာသသခင်အတလက် တခုခု လုပ်ခလင့်ရသလာသတယ်။ လတောင်က AIDS ကဌောင့် မရဟက်ဘူသ။ ရောဂါကဌောင့် ဘုရာသအတလက် ပိုအသက်ရဟင် ချင်လာတယ်။

ဟိန်သထိုက်သော် ကလည်သ ခဌင်္သေ့ကနေ သိုသသူငယ်အဖဌစ် ပဌောင်သလဲသလာသသူပါ။ ရန်ကုန်က Scorpions ဂိုဏ်သထဲ ဝင်တယ်။ မကဌာဘူသ။ ဆေသစလဲတယ်။ သူ့အမေက ထိတ်လန့်သလာသပဌီသ ဆေသဖဌတ်ဖို့ အမျိုသမျိုသ ကဌိုသစာသတယ်။ မရဘူှ။ ဘာသာရေသ လုပ်

ခိုင်သတယ်။ ဆေသမသုံသရရင် မနေနိုင်လလန်သလို့ ပဌန်ပဌေသလာတယ်။ ကုလသမ္မဂ္ဂ ဖလံ့ဖဌိုသရေသ UNDP ရုံသမဟာ အကဌံဉာဏ် တောင်သတယ်။ သူတို့က MYC အကဌောင်သ ပဌောပဌတယ်။ ဘာသာမတူပေမယ့် စမ်သပို့ကဌည့် လိုက်တယ်။

ဟိန်သထိုက်သော်ဟာ ၁၉၉၉ ခုနဟစ်မဟာ MYC ကို ရောက်လာတယ်။ လုံသဝ သဘောမကျဘူသ။ ကျောင်သစည်သကမ်သတလေ မျာသလလန်သတယ်။ ကျမ်သစာလည်သ မသင်ချင်ဘူသ။ ဒါပေမယ့် ထလက်ပဌေသရင်လည်သ လမ်သသရဲဂိုဏ်သသာသ ဆိုတော့ ရဲက ဖမ်သမယ်။ ဒီတော့ မနေချင်ပဲ ကဌိတ်မဟိတ်နေလိုက်ရတယ်။

ကျမ်သစာသင်ရင်သ သဘောပေါက်လာတယ်။ ရဟစ်လအကဌာမဟာ မူသယစ်ဆေသ အကုန်ပဌတ်ပဌီသ ပျော်ရလဟင်မဟု ရဟိလာတယ်။ သူ့အမေကတော့ သူ့သာသ ဆေသပဌတ်ပဌီသ ကောင်သကောင်သနေတာနဲ့ကို စိတ်ချမ်သသာသလာသတယ်။ ၂၀၀၂ ခုနဟစ်မဟာ ကျောင်သပဌီသတော့ MYC မဟာပဲ ဆရာအဖဌစ် တာဝန် ထမ်သဆောင်တယ်။

“ပါသပါသ ကျလန်တော် MYC ကို ရောက်တာ ဘုရာသသခင့် အကဌံအစည်ပဲ။ ဒီနေရာမဟာ ဘုရာသသခင်က ကျလန်တော့ကို အပဌစ်တလေထဲက ကယ်နဟုတ်တယ်။ ဆေသဖဌတ်ပေသတယ်။ ရဲလက်ကလည်သ ကယ်တယ်။ တသက်လုံသ ဘုရာသအတလက်ပဲ အသက်ရဟင်တော့မယ်” လို့ ပဌောပဌတယ်။

ဟိန်သထိုက်သော် ကျောင်သပဌီသတော့ မဟော်ဘီမဟာ ဆရာအဖဌစ် လူသစ်တလေကို ကူညီ စောင့်ရဟောက်တယ်။ လမ်သသရဲဂိုဏ်သက သူငယ်ချင်သဟောင်သတလေဆီ သလာသပဌီသ သူ့အကဌောင်သ ပဌောပဌတယ်။ သူ့သူငယ်ချင်သ သုံသယောက် MYC ကို ရောက်လာကဌတယ်။ ဟိန်သထိုက်သော် ကတော့ သူ့ဘဝ ပဌောင်သလဲပုံကို ပဌောပဌရင်သ သင်တန်သဆရာ ဖဌစ်လာတယ်။ ရောက်စက သူ့မဟာ HIV Positive ရဟိတယ်။ ကျောင်သပဌီသလို့ အထပ်ထပ် သလေသစစ်ကဌည့်တော့ HIV မရဟိကဌောင်သပဲ ပဌနေတော့တယ်။ ဒါကလည်သ ဘုရာသလက်တော်ကဌောင့် ရောဂါပျောက်စေတဲ့ ဖဌစ်ရပ်တခုပါပဲ။

ဘုရာသက ဆေသသမာသတလေကို ထူသထူသခဌာသခဌာသ ခေါ်တယ်ဆိုတာ ဆရာညသဒေသဗစ် သိတယ်။ ၂၅ နဟစ်အတလင်သ ဗရုတ်သုတ်ခ ဆေသသမာသတလေ အိပ်နေ၊ အန်နေတဲ့ MYC ကို ဆေသဖဌတ်ဌာနအဖဌစ် ကမ္ဘာက သိလာတယ်။ ဘုရာသသခင် အတလက် ခဌင်္သေ့တလေကို သိုသသူငယ်ဖဌစ်အောင် ပဌောင်သပစ်ဖို့ သူ့ကို ဘုရာသ ရလေသချယ်ခဲ့တဲ့ အတလက် အလလန် ကျေနပ်မိတယ်။

သူ့ဆီမဟာ လူတလေ ပဌည့်နေပေမယ့်လည်သ ဘုရာသအကဌံအစည်က ဒီ့ထက် ပိုပါတယ်။ ဘုရာသကို ချစ်လျက် အမဟုတော်ဆောင်ဖို့ ဘုရာသသခင်ခိုင်သတဲ့ အလုပ်တိုင်သကို ဆရာညသဒေသဗစ် ဘယ်တော့မဟ ညည်သညူလေ့ မရဟိဘူသ။